Vi er glade for å ha Kristin Vego tilbake som gjestelærar på årsstudiet sitt kurs i kortare prosa i haust, og i det høvet inviterer vi til temakveld med henne.
Vego skal halde eit føredrag for oss, der ho snakkar med utgangspunkt i romanen ho held på å skrive, ein roman som kanskje/kanskje ikkje kjem til å finnast. Ho vil snakke om å skrive ut frå erfaring eller førestilling, om balansen mellom det kvardagslege og det usedvanlege, om å skrive som mor/kvinne, og om lesing og originalitet. Og: kvifor skriv ho i det heile tatt …?
Vi tilrår dette arrangementet på det varmaste for alle skrivande, og andre som måtte vere interesserte i å høyre ein forfattar dele raust og ope om eigen prosess.
Kristin Vego (f. 1991) er ein dansk-norsk forfattar frå Aarhus, busett i Oslo. Ho debuterte i 2021 med novellesamlinga Se en siste gang på alt vakkert. For den tok ho imot både Tarjei Vesaas» debutantpris og den prestisjetunge Bogforums debutantpris i Danmark.
I 2024 gav ho ut romanen Sent på dagen, som hausta gode kritikkar og som vart trekt fram som ei av årets ti beste bøker i Aftenposten.
I år kom ho med essaysamlinga Kanskje det er mitt hjerte, som er ei undersøking av kva litteratur kan vere, samtidig som den utforskar kva det vil sei å bli mor.
Vego har òg tidlegare vore redaktør i tidsskriftet Vagant og kritikar i Dagbladet Information.
Sal av øl og vin. Gratis inngang. Ope for alle.
Temakveldane er arrangement der akademiet gjev det allmenne publikum høve til å møte gjestelærarane våre i ei intim ramme, og der det òg vil bli mogleg for publikum å stille spørsmål til og samtale med forfattaren.
Temakvelden finn stad i Skrivekunstakademiet sine lokale på Georgernes Verft 12. Inngang E.
