Studentane på årsstudiet har laga antologi og for å feira dette inviterer dei til lansering og fest på Landmark onsdag 20. mai kl. 20:30!

Grand Detour: Att ta en längre väg för att undvika någonting eller – finna något annat längs vägen. 

Vad kan man finna längs vägen av någon annans språk? 

Dørene opnar: 20:00
Start: 20:30
Musikk: Pretty Little Tubas
Opplesingar frå studentane
Gratis inngang

Stad: Landmark, Rasmus Meyers allé 5, 5015 Bergen

Skrivekunstakademiet og Tekstallianse ønskjer velkommen til eit møte med nokre av byens forfattarar og redaktørar på Tekstallmenningen onsdag 29. april, kl. 18:00.

Vi har invitert dei til å fortelje om arbeidet sitt og kva tidsskrift, fanziner og småforlag har hatt å seie for dei, korleis tekstar skrive for mindre format kan bli forløysande og retningsgjevande for eit forfattarskap, redaktørens arbeid med å utvikle tekstar og skribentar, og erfaringar med å starte opp eit eige tidsskrift eller forlag.

Eit gjennomgangstema er òg dei fellesskapa som er viktige rundt skriving og lesing.

Kveldens gjestar:
Eira Søyseth, poet og initiativtakar til og redaktør for Blekk
Martin Årseth, journalist og redaktør for Syn og Segn
Laia Núñez Sebastià og Soledad Marambio Castro, forleggjarar og redaktørar i Les Bones Dones

Arrangementet byrjar klokka 18 og varar i en time. Etterpå vert det mingling og forfriskingar fram til kl. 20.

Stad: Tekstallmenningen, Markeveien 4 B, 5012 Bergen

Gratis og ope for alle!

Arbeider du med eit litterært manuskript og vil fordjupe deg i skrivepraksisen din?

Søknadsskjema for Påbyggingskurs i skapande skriving 2026/2027 ligg no ute her på nettsidene våre. Søknadsfristen er 30. april kl. 23:59. Les meir og søk her.

Forfattar, journalist og påtroppande akademileiar på Skrivekunstakademiet, Sandra Lillebø, er òg gjestelærar på vårens romankurs, og i det høvet inviterer vi til temakveld på akademiet!

Tittelen for kvelden er Romanens flyt og hinder, og vi får høyre Lillebø i samtale med Tormod Haugland om skriveprosessen med den siste romanen hennar, Vera (2026). 

Sandra Lillebø debuterte som forfattar i 2011 med diktsamlinga Navnet på den ensomme er frigitt. I 2016 kom den andre boka hennar, diktsamlinga Alt skal skinne og blø. Lillebø gav ut sin første roman, Tingenes tilstand, i 2020 til strålande kritikkar, og i 2023 kom romanen En fransk familie. Lillebø fekk Bjørnsonstipendet i 2021 og romanene hennar er gjeve ut både i Sverige og Danmark.

Temakveldane er arrangement der akademiet gjev det allmenne publikum høve til å møte gjestelærarane våre i ei intim ramme, og der det òg vil bli mogleg for publikum å stille spørsmål til og samtale med forfattaren.

Dato: Torsdag 26. mars
Tid: 19:00
Stad: Skrivekunstakademiet sine lokale på Georgernes Verft 12. Inngang E.

Gratis inngang.
Sal av øl og vin.
Ope for alle.

Skrivekunstakademiet har i dag tilsett forfattar og journalist Sandra Lillebø (f. 1978) som ny akademileiar. Lillebø vil byrje i stillinga 1. april og tek over etter Sivert N. Nesbø, som har vore leiar sidan 2021.

Sandra Lillebø er ein kritikarrost forfattar og journalist, som i vår er aktuell med si sjette utgjeving, romanen Vera (Oktober forlag), som har motteke strålande meldingar. Lillebø har ein master i filosofi frå Sorbonne og har vore verksam som kritikar og journalist i ei årrekke. Ho har sete i Skrivekunstakademiet sitt styre sidan 2020, og har gått påbyggingskurset i skapande skriving. 

Styreleiar Børge Lunde trekker fram at Lillebø ved sidan av eigen forfattarskap og journalistgjerning har solid erfaring frå litteratur- og kulturformidling innanfor eit breitt spekter av emne. Ho har òg vore sentral i formidlinga av Annie Ernaux sin forfattarskap i Noreg.

Han meiner Lillebø sin kombinasjon av solid forfattarskap, organisatorisk kapasitet, kulturfagleg forståing og kontaktskapande evner gjer henne  til ein svært god kandidat til stillinga.

– Lillebø er godt kjend med landskapet på kulturfeltet, er ei etablert og tydeleg røyst i media gjennom kommentarar og ytringar og har god forståing for gjeldande forvaltningspraksis, seier han. 

Lillebø seier følgande om kvifor ho søkte på stillinga som akademileiar:

– Skrivekunstakademiet er ein av dei viktigaste institusjonane for unge skrivande i Noreg og Norden. Det er umogleg å overvurdere det arbeidet for litteraturen som er lagt ned der dei siste 40 åra, og eg ser det som eit stort privilegium å få lov til å vere med å legge til rette for at dei kommande forfattargenerasjonane skal kunne utvikle kunsten vidare. Det er inga lita oppgåve, og eg har store sko å fylle, så eg er svært glad for den kompetente og erfarne staben som ventar meg i lokala på Verftet. Kursen vidare blir staka ut i samarbeid med dei. 

Den nye leiaren meiner det er ein føremon for Skrivekunstakademiet at det ligg på Vestlandet, men òg ein føremon for Vestlandet at Skrivekunstakademiet ligg nett der. 

– Både kunsten og distrikta er under stort press. Men dei har det felles at båe er nødvendige for eit godt og levedyktig samfunn, og difor er eg optimist. Eg meiner det er på høg tid at politikarane og næringslivet i Bergen og på Vestlandet anerkjenner det gullet Skrivekunstakademiet er for byen og regionen, og trur at det vi får igjen i form av ein levande, attraktiv by ikkje berre gjer at vi har det kjekkare her enn andre stader, men at det også gir inntekter som langt overstig dei offentlege overføringane.

Vi ønsker Lillebø hjarteleg velkommen til oss og gler oss til å samarbeide med henne om vegen vidare!