Skrivekunstakademiet

Studentar frå SKA i Bok i P2

skrivekunst — Thu, 04 Mar 2010 11:52:33 +0000

På ein førebels ukjend dato etter påske kan du høyre to av Skrivekunstakademiets studentar på Bok i P2. Aina Villanger og Eivor Elisabeth Daae Mæland deler sine tankar om forfattaren Virginia Woolf og klassikaren To the lighthouse. Også skrivelærar Gunnhild Øyehaug deltek i programmet.

Temakveld om ny, omsett poesi

skrivekunst — Tue, 09 Feb 2010 12:25:02 +0000

Gunnar Wærness og Pedro Carmona Alvarez gjekk i same klasse på Skrivekunstakademiet i 1994/1995. Det er mange år og bøker sidan den gongen, men no jobbar dei to saman om eit gigantverk med til no upublisert internasjonal ny poesi.

Høyr Gunnar Wærness og Pedro Carmona Alvarez fortelje om boka og omsettingsarbeidet på Café Opera tysdag 16. februar klokka 19:00. Arrangementet er gratis og støtta av Sparebanken Vest, Norsk kulturråd og Bergen kommune.

Klikk på biletet for større versjon: Pedro står på øvste rad, lengst til høgre. Gunnar sit som nummer tre frå høgre på nedste rad.

Tekst som lyd # 4

skrivekunst — Mon, 18 Jan 2010 12:18:06 +0000

Kom til Landmark torsdag 21.01. klokka 19:00! Då framfører årets studentar ved Skrivekunstakademiet eigne tekstar til lyd, i samarbeid med lydkunstnar Per Platou. Her kan ein høyre resultatet av fjorårets tekst som lyd-arrangement. På biletet: konsentrert Per Platou under framføring på Café Opera i fjor.

Skrivekunstakademiet fornyar seg

skrivekunst — Thu, 14 Jan 2010 08:33:29 +0000

Skrivekunstakademiet går for tida gjennom ei oppfrisking. Lokala blir lysare og mykje av inventaret blir skifta ut til fordel for meir praktiske og behagelege løysingar. I løpet av våren skal vi vere ferdige med alle rom, men nyt alt no godt av nytt kjøkkeninventar med oppvaskmaskin og ei sofagruppe i biblioteket.

På bileta: 1. Den nye kjøkkenkroken, førebels ubrukt og rein. 2. Studentane Aina Villanger og Eivor Elisabeth Daae Mæland et lunsj i biblioteket.

Tvisynt temakveld med Vinje og Rorgemoen

skrivekunst — Mon, 23 Nov 2009 12:05:20 +0000

Aasmund Olavsson Vinje er mannen bak Ferdaminni fraa Sumaren 1860. Kjersti Rorgemoen er kvinna bak masteroppgåva “Her er mine Dyr” hausten 2007. Torsdag 10. desember klokka 19:00 føredrar Rorgemoen om Vinjes Ferdaminni på Skrivekunstakademiet.Vi serverer to sortar julekaker og to sortar julebrus. Vel møtt!

Debutantar frå Skrivekunstakademiet

skrivekunst — Mon, 23 Nov 2009 11:41:23 +0000

Seks av dei skjønnlitterære debutantane frå 2009 har tidlegare gått på Skrivekunstakademiet i Hordaland. I vår kom Tommy Skoglunds diktsamling Våkne som en del av naturen og Christian Valeurs roman Steffen tar sin del av ansvaret. Bokhausten starta friskt med Kjersti Skomsvolds Jo fortere jeg går, jo mindre er jeg, ein roman som vart nominert til bokhandlarprisen. Sidan kom også kontorfullmektig Kjersti Rorgemoens Purkene snudde seg, Hege Siris (bilete) diktsamling Et øyeblikk, noen tusen år og Cesilie Holcks Norg. Vi gratulerer alle saman!

Foto: Rolf M. Aagaard.

Dansk diktdronning møter poet frå Fyllingsdalen

skrivekunst — Fri, 13 Nov 2009 11:19:11 +0000

Skrivekunstakademiet ønskjer velkommen til temakveld med to spanande poetar. Mette Moestrup er ein av Danmarks viktigaste forfattarar, og ho har nyleg gitt ut romankollagen Jævnet med jorden Når ho no besøker Bergen i samband med undervisning på Skrivekunstakademiet, er det med stor glede vi inviterer eit større publikum til å høyre henne lese frå og snakke om si nye bok.

Samtalepartnaren Erlend Nødtvedt brakdebuterte med diktsamlinga Harudes i 2008, og har det siste året markert seg tydeleg på den bergenske litteraturscenen.

Velkomen til Café Opera tysdag 17. november klokka 19:00.

Førstehjelpskurs i dramaturgi

skrivekunst — Mon, 19 Oct 2009 09:17:44 +0000

Treng du kyndige råd om korleis du byggjer opp vellukka dramaturgi i tekstane dine? Velkomen til seminar på Studentsenteret i Bergen, Auditorium A og B, laurdag 24. oktober! Gunnar Staalesen gjev eit innblikk i forfattarverkstaden sin, med føredraget Skrivebordets hemmeligheter. Ingelin Røssland om korleis det enkle kan bli genialt i føredraget Frå to små tomatar til Jason Bourne. Og litteraturvitar Frode Helmich Pedersen fortel om fortellerteknikk med døme frå verdslitteraturen. Seminaret er gratis! Og det varar frå 11:00 til 14:30. Møt opp i god tid for å kapre ein god plass.

Nye studentar på skrivekunstakademiet

skrivekunst — Mon, 31 Aug 2009 07:33:24 +0000

For å illustrere ei sak om nye studentar, har vi funne eit bilete av gamle studentar. Her er gruppa som gjekk ut frå Skrivekunstakademiet i 1987, saman med skrivelærarane Jon Fosse, Rolf Sagen og Erland Kiøsterud. Ser du godt etter blant studentane, får du auge på dagens leiar av Forfatterforeningen. Fleire tidlegare studentar, kan du sjå her.

Men i dag ønskjer vi altså nye studentar velkomne til årskurs i skapande skriving. Dei heiter Joakim Hunnes, Lars Leenderts, Eirik Lunde, Eivor Elisabeth Daae Mæland, Vigdis Nybø, Ane Nydal, Charlotte Kirkebø Riise, Arild Rossebø, Silje Osnes Ulstein, Siri Katinka Valdez, Aina Villanger og Eli Fossdal Vaage. Vi gler oss!

Sultprisen til Gunnhild Øyehaug

skrivekunst — Wed, 19 Aug 2009 09:41:00 +0000

Gunnhild Øyehaug er fast lærar på Skrivekunstakademiet, og i dag vart ho tildelt Sult-prisen. Prisen er på 100 000 kroner, og vart utdelt på Kolon forlags pressekonferanse. På same arrangement vart Kjersti Rorgermoens debutbok Purkene snudde seg lansert. Skrivekunstakademiet gratulerer begge to.